TdE048. Gaucelm Faidit. Fort chauza es...

GAUCELM FAIDIT (Uzerche, Llemosí, c. 1150 - ? c. 1220) "FORTZ CHAUZA ES QUE TOT LO MAJOR DAN" I

Fortz chausa es que tot lo major dan e·l major dol, las! qu'ieu anc mai agues, e so don dei tostemps planher ploran, m'aven a dir en chantan e retraire, [5] car selh qu'era de valor caps e paire, lo rics valens Richartz, reys dels engles, es mortz; ai Dieus! quals perd'e quals dans es! quant estrangz motz, quan salvatge a auzir! Ben a dur cor totz hom qu'o pot suffrir.

II

[10] Mortz es lo reys, e son passat mil an qu'anc tan pros hom no fo ni no·l vis res, ni mais no er nulhs hom del sieu semblan, tan larcs, tan pros, tan arditz, tals donaire; qu'Alichandres, lo reys que venquet Daire, [15] no cre que tan dones ni tan mezes ni anc Charles ni Artus tan valgues, qu'a tot lo mon se fes, qui·n vol ver dir, als us duptar et als autres grazir.

III

Meravil me del fals secgle truan [20] co·i pot estar savis hom ni cortes, pus ren no·i val belh ditz ni fait prezan; e donc, per que s'esfors'om pauc ni guayre? Qu'era nos a mostrat Mortz que pot faire, qu'a un sol colp a lo mielhs del mon pres, [25] tota l'onor, totz los gaugz, totz los bes; e pus vezem que res no·i pot guandir, ben deuri'om meins duptar a murir.

IV

Ai! senher reys valens, e que faran hueimais armas ni fort tornei espes [30] ni ricas cortz ni belh don aut e gran, pus vos no·i etz, qui n'eratz capdelaire? Ni que faran li liurat a maltraire, silh qui s'eran el vostre servir mes, qu'atendion que·l guazardos vengues? [35] Ni que faran cilh, que·s degan aucir, qu'aviatz faitz en gran ricor venir?

V

Longa ira e avol vida auran e tostemps dol qu'enaissi lo es pres e sarrazi, turc, payan e persan [40] que·us duptavon mais qu'ome nat de maire, creisseran tan d'erguelh e lur afaire que plus tart n'er lo sepulcres conques; mas Dieus o vol, que, s'il non o volgues e vos, senher, visquessetz, ses falhir [45] de Suria los avengr'a fugir.

VI

Hueimais non ai esperansa que·i an reys ni princeps que cobrar lo saubes; pero tug silh qu'el vostre loc seran, devon gardar cum fos de pretz amaire [50] e qual foron vostre dui valen fraire, lo Joves Reys e·l cortes coms Gaufres; e qui en loc remantra de vos tres, ben deu aver aut cor e ferm cossir de far bos faitz e de socors chauzir.

VII

[55] Ai! senher Dieus, vos qu'etz vers perdonaire, vers Dieus, vers hom, vera vida, merces, perdonatz li, que ops e cocha l'es, e non gardetz, Senher, al sieu falhir, e membre vos com vos anet servir!

Font: Martí de Riquer, Los trovadores. Historia literaria y textos, II, Barcelona: Editorial Planeta, 1975, pàgs. 770-773).